Þjóðhátíðardagur Íslands   – í 80 ár

17. júní hátíðahöld í Gautaborg.  Útihátíð verður haldin mánudaginn 17. júní kl. 17 (ath. tíma) á lóðinni við safnaðarheimili Västra Frölunda kirkju. 

Þessa dagana er veður risjótt, vonandi sól úti, sól inni og sól í sinni En ef veðrið verður kalt/blautt höfum aðstöðu fyrir dagskrá og snæðing inni í safnaðarheimilinu.

Þeir sem vilja geta tekið með sér nestiskörfu og aðstaða er til að grilla, við kyndum grillin.  

Dagskráin: Íslenski kórinn í Gautaborg syngur undir stjórn Daniels Ralphssonar og leiðir almennan söng. Júlíus Sigmundsson leikur á píanó.Fjallkonan Guðný Ása Sveinsdóttir flytur ljóð. Christina Nilroth ræðismaður flytur ávarp. 

Gleði og kátína í fögru umhverfi.  

Sölubíll frá Grimsis verður á staðnum frá kl. 16.30 og selur íslenskan fisk, kjöt og sælgæti. Einnig er hægt að kaupa kryddlegið lambakjöt tilbúið beint á grillið! … eða til að taka með heim og grilla. Gott er að panta fyrirfram í síma 033 289095 eða með skilaboðum á order@grimsis.se

Þátttökugjald er 50kr á hvern fullorðinn, frítt fyrir börn (eða frjáls framlög). Við höfum kostnað vegna grillaðstöðu, tónlistar og húsnæðis.  Vinsamlega swishið á: 123 572 45 62

Verið velkomin!

Hæ, hó jibbí jei og jibbíí jei!

Þjóðhátíðarnefndin

Fermingarfræðsla Íslensku kirkjunnar í Svíþjóð

Íslenska kirkjustarfið í Svíþjóð býður upp á fermingarfræðslu nú sem fyrr. Þátttakendur geta komið af öllu landinu. Við reynum að brúa fjarlægðir með því að hittast á fermingarmótum, boðið er upp á fræðslusamverur og auk þess notum við símtöl og tölvupóst til að vera í tengslum.

Skráning í fermingarfræðslu fyrir næsta vetur er til 10. ágúst.  Áhugasamir eru beðnir að senda póst á kirkjan@telia.com til að fá fyllri upplýsingar og/eða fá skráningarblað sent til baka.

Fermingarmót í september

Fermingarundirbúningurinn hefst með fermingarmóti á Åh Stiftgård helgina 20. til 22. sept. 2024.  Hópurinn hittist á brautarstöðinni í Gautaborg á föstudegi.  Við förum með rútu til Åh stiftgård sem er 70 km fyrir norðan Gautaborg. Komum aftur til Gautaborgar um hádegi á sunnudegi og þaðan taka allir lest eða rútu heim.

Á fermingarmótinu gefst tækifæri til að kynnast og byrja fræðsluna af krafti. Á mótinu samtvinnum við nám, leik og skemmtilega samveru. Við reiknum með um 45 unglingum í fermingarfræðslu á mótið. Síðan eru um 15 ungleiðtogar á mótinu og 10 fullorðnir til að hafa umsjón með dagskránni. Íslenskir unglingar í fermingarfræðslu frá Svíþjóð, Noregi og Danmörku hittast á þessu móti.

Fræðsla og kirkjusókn í vetur

Fræðslan heldur áfram eftir fermingarmótið með því að unglingarnir sækja guðsþjónustur í heimabyggð og skila verkefnum með tölvupósti. Fræðslufundir eru í tengslum við íslenskar guðsþjónustur. Einnig er boðið upp á símakennslutíma fyrir þá sem ekki komast í kennslustundir tengdar íslensku helgihaldi.

Fermingarmót í maí 2025

Að vori hittist hópurinn að nýju á sama stað, vormótið er ráðgert 9. til 11. maí 2025.

Fermingardagar

Það er valfrjálst hvort fermingin fari fram í Svíþjóð eða á Íslandi. Fermingarguðsþjónustur eru yfirleitt í maímánuði hér Svíþjóð.

Unglingarnir geta fengið leyfi til að fermast fyrr eða í kringum páska 2025 á Íslandi þó fermingarfræðslu sé ekki lokið hér hjá okkur, en skuldbinda sig þá til að koma á seinna fermingarmótið og ljúka kennsluprógramminu.

Skráning stendur yfir eða til 10 ágúst.

Þeir sem vilja vera með í fermingarfræðslu næsta vetur þurfa að skrá sig sem fyrst eða fyrir 10. ágúst. Vinsamlegast hafið samband á kirkjan@telia.com og biðjið um skráningarblað, einnig er velkomið að leita frekari upplýsinga hjá undirrituðum í síma 070 286 39 69.

Bestu kveðjur, Ágúst Einarsson, prestur Íslendinga í Svíþjóð.